فرانسیسی صدر کے بیانات: عمران خان کا مسلمان رہنماؤں کے نام خط، متعدد مسلمان ممالک میں فرانس کے خلاف غصے کی لہر

 پاکستان کے وزیرِ اعظم عمران خان نے مسلم دنیا کے رہنماؤں کو ایک خط تحریر کیا ہے جس میں کہا گیا ہے کہ ’ہمیں مسلمانوں کا پیغام دنیا بھر میں پہنچانا ہو گا تاکہ مغربی دنیا کے رہنما بھی مسلمانوں کی عزت کریں۔‘

وزیر اعظم آفس سے جاری ہونے والے اس خط میں عمران خان نے عالمی مسلم رہنماؤں سے کہا ہے کہ ’آج ہمیں مسلم امہ میں مغربی دنیا خاص کر یورپی ممالک کی جانب سے اسلاموفوبیا اور پیغمبرِ اسلام کی تضحیک اور طنز پر مبنی متنازع خاکوں کے ذریعے کیے جانے والے حملوں پر خدشات اور بے چینی دیکھنے کو مل رہی ہے۔‘

انھوں نے کہا کہ ’چند یورپی رہنماؤں کی جانب سے دیے گئے بیانات اور قرآن کی بیحرمتی سے متعلق واقعات اس بات کی جانب اشارہ ہیں کہ یورپی ممالک، جہاں مسلمان کثیر تعداد میں آباد ہیں، میں اسلاموفوبیا میں اضافہ دیکھنے میں آ رہا ہے۔‘

عمران خان کا مزید کہنا تھا کہ یورپ میں مساجد بند کر دی گئی ہیں، مسلمان خواتین سے ان کی مرضی کا لباس زیب تن کرنے کی آزادی بھی چھینی جا رہی ہے حالانکہ وہاں پادری اور راہبائیں اپنے مذہبی لباس پہنتے ہیں۔ انھوں نے کہا کہ یورپ میں مسلمانوں کے خلاف کھلے عام اور ڈھکے چھپے انداز میں تفریق دیکھنے میں آتی ہے